Posted on

Human sa napulo ka adlaw sa pagpamutos og seedlings sa mga klase-klaseng puno-an, pagpananom og kawayan sa daplin sa suba, ug pagpananom sa mga utanon pinaagi sa communal gardening, 184 ka mga residente sa Barangay Lourdes, Alubijid, Misamis Oriental ang makakubra na sa ilang ayuda isip mga benepisyaryo sa Risk Resiliency Program-Climate Change Adaptation, Mitigation and Disaster Risk Reduction (RRP-CCAM).

Mga residente sa Barangay Lourdes, Alubijid Misamis Oriental nga nananom sa klase-klaseng gulay sulod sa napulo (10) ka adlaw

Ang RRP-CCAM usa ka cash-for-work nga programa nga gipatuman sa Department of Social Welfare and Development Field Office 10 para sa mga pamilya aron sa pagpakunhod sa kapit-os nga gidala sa Climate Change.

Pinaagi sa paghangyo og pondo sa lokal nga pangagamhanan sa munisipyo sa Alubijid, Misamis Oriental ngadto sa DSWD-10, aron mapatuman ang cash-for-work program, ang mga residente nakabaton og trabaho sa napulo ka-adlaw. Sa sweldo nga P274.00 matag adlaw, ang matag trabahante makadawat og P2,740 gikan sa DSWD-10.

184 ka kawayan ang natanom sa mga benepesyaryo kilid sa suba kini pagpangandam sa dakong pagbaha kung adunay ulan sa ilang lugar

Adbokasiya sa DSWD-10 ang pagtabang sa katawhan batok sa epekto sa kabag-ohan sa palibot nga gidala sa Climate Change. Kini pinaagi sa pagtudlo kanila kung unsa kining Climate Change ug unsang mga pamaagi aron sila makahiangay sa kabag-ohan nga gidala niini.

Sumatotal 3,076 kaputos nga seedlings ang nahimo sa mga benepisyaryo samtang 184 ka samplings sa kawayan ang natanom nila sa daplin sa suba. Kini nga mga proyekto gihimo isip mga panagang sa epekto sa kausaban nga gidala sa Climate Change.