Taliwala sa mga granular lockdown nga nasinati sa nasud, ang Department of Social Welfare and Development (DSWD) nagpadayon sa pagpangapud-apod sa pensyon sa mga kabus nga senior citizen nga benepisyaryo sa programa.

Pinaagi sa mga pagkugi sa mga Sepcial Disbursing Officers sa matag DSWD Field Offices, nagpadayon ang pagbayad sa 3.8 milyon nga target nga benepisyaryo para sa 2021.

Sumala sa pinaka-ulahing datos niadtong Mayo 31, nabayaran na ang 2 milyon nga seniors ug nagkatunga na ang Departamento sa target nga maserbisyohan niini.

Naangkon sa Field Office VI ang pinakataas nga datos sa mga nabayaran nga benepisyaryo diin 100% nga natibawas ang pagbayad kanila. Gisundan kini sa Field Office (FO) Cordillera Administrative Region nga mitala og 94.65%, ug FO VII nga duna’y 91.09%.

Dakong hagit alang sa ubang rehiyon ang pagkab-ot sa ilang target tungod sa gakataas nga tala sa COVID-19 sa ilang lugar, kulang nga personahe tungod sa mga mandatory 14-day quarantine, mga nagkadungan-dungan nga implementasyon sa ubang programa sa DSWD, ug kalisod sa mga paglihok-lihok ug pagbyahe tungod sa mga polisiya sa kwarantinas.

Aron mapasayon ang pagtunol sa pensyon sa mga seniors, hugot nga nakigtimbayayong ang DSWD sa Landbank of the Philippines (LBP) para sa paghatag og mga cash cards. Sa first quarter sa 2021, nakahatag na og 596, 796 nga cash cards ang Landbank sa mga benepisyaryo sa rehiyon sa NCR, CAR, II, III, IX ug Caraga. Gisumite na ngadto sa Landbank ang mga nahibilin sa listahan nga mga social pensioners aron ma ablihan na sila og account ug mahimoan na og cash card.

Dugang pa, aron pagtamod sa house resolution nga gi sang-at sa House of Representatives Committee on Senior Citizen, gi-istudyohan ug gi-plantsa karon sa Departamento ang mga gabayan para mahimong quarterly na ang pagpangapod-apod sa social pension imbes nga tag unom ka bulan.

Pinaagi niini, mas dali nga matagbo ang inadlaw-adlaw ug medikal nga panginahanglanon sa mga senior citizens, hilabina karon nga kahimtang sa pandemya.

Nabatyagan sa DSWD nga ang ginahatag nga ayuda, kasagara mapadulong sa pagkaon, tambal ug vitamins, health check-up, ug uban pang medikal nga mga panginahanglanon sa mga senior citizens.###