210 ka pamilya o 496 indibidwal nga namauli sa Northern Mindanao ang benepisyaryo ilawom sa Balik-Probinsya Bagong Pag-asa (BP2) Program sa DSWD.

Nagsumikad sa Executive Order No. 137 s. 2021 ni Presidente Rodrigo Duterte, buot sa programa nga paluagan ang mga highly urbanized cities sama sa Metro Manila ug dasigon ang mga pamilya nga mo uli sa ilang lugar aron sugdan ang bag-ong yugto sa ilang kinabuhi.

Aron pag-abag kanila, pinansyal nga ayuda ang giandam sa gobyerno nga mao ang: Emergency Financial Assistance, Transportation and Relocation Assistance, Transitory Family Support Package (10,000-50,000), Livelihood Settlement Grants (shall not exceed to 50,000) ug Transitory Shelter Assistance (1-2 years house rental, est. 120,000-240,000).

Gipunting nga mga benepisyaryo sa programa ang mga indibidwal ug pamilya nga: apektado sa mga proyekto sa gobyerno, gipalayas gumikan sa mga demolisyon, mga nanimuyo sa kalsada, mga apektado sa kalamidad lakip hulga sa panglawas, mga nawad-an og trabaho, mga kabus, ug uban pang sitwasyon nga balido sumala sa pagsuta sa DSWD.

Pito ka munisipyo sa Region X ang nidawat niini nga mga pamilya nga mao ang: Balo-i, Sultan Naga Dimaporo, Initao, Villanueva, Sinacaban, Bonifacio, ug Clarin.

Ilawom sa DSWD KALAHI-CIDSS, 7.5 million ang gitagana matag LGU aron pagpatuman sa mga community-identified sub-projects. Dugang pondo nga 500,000 alang sa social preparation activities ug 300,000 alang sa mga training.

Gilantaw sa programa dili lang ang pagtabang sa mga gusto na mamauli sa ilang probinsya, apan ang balanse nga pagpauswag sa mga rehiyon ug malangkubon nga kalambuan sa tibuok nasod.

Kung ikaw ug imong pamilya bag-ohay niuli sa probinsya ug nakasulod sa criteria nga nasangpit sa unahan, bisita sa inyong lokal nga social welfare and development office (MSWDO/CSWDO) aron ikaw ma assess.