UNSA ANG FOOD UG FINANCIAL ASSISTANCE?

Ang food assistance sa DSWD gipanghatag para sa mga bakwit nga gikan sa Marawi City. Naghatag ug P1,000 ang DSWD para sa gikingahanglan nga pagkaon sa Ramadan, ug dugang nga P4,000 para sa ilang pagpanguli sa Marawi City.

KINSA ANG MAKADAWAT SA P5,000 NGA FOOD UG FINANCIAL ASSISTANCE?

Ang makadawat sa P5,000 mao lang ang napamatud-an / na-validate sa DSWD / CSWDO / MSWDO nga tinuod nga bakwit gikan sa Marawi, apil sa kadtong nagpuyo sa mga evacuation centers, ug kadtong mga home-based (mga bakwit nga nagpuyo sa mga komunidad, gawas sa evacuation center)

KANUS-A NAGSUGOD ANG PAGPANGHATAG SA FOOD ASSISTANCE?

Niadtong June 20-29, 2017, nanghatag ug P1,000 ang DSWD para sa na validate nga mga bakwit nga naa sa evacuation centers ug home-based basi sa listahan sa mga bakwit nga na-validate niadtong June 14, 2017. Kini gipanghatag dungan sa pagsaulog sa Eid Al-Fitr – ang pagtapos sa Ramadan.

NAKADAWAT NA KO SA P1,000 FOOD ASSISTANCE GIKAN SA DSWD NIADTONG JUNE 20-29, 2017, KANUS-A UG ASA NAKO MAKUHA ANG P4,000?

Sa kadtong nakadawat na sa P1,000 niadtong June 20-29, 2017, ilang madawat ang ilang P4,000 didto na sa Marawi City, sa ilang pag-uli. Ang schedule himuon pa sa DSWD-ARMM.

WALA KO MAKADAWAT SA P1,000 GIKAN SA DSWD NIADTONG JUNE 20-29, 2017, KANUS-A UG ASA NAKO MAKUHA ANG FOOD ASSISTANCE?

Ang wala makadawat sa P1,000 niadtong June 20-29, 2017, ilang makuha ilang P1,000 apil ilang 4,000 didto na sa Marawi City, sa ilang pag-uli. Ang schedule himuon pa sa DSWD-ARMM. Ang kadto rang nakarehistro ug na-validate sa DSWD / CSWDO / MSWDO ang makadawat sa kwarta.

TINUOD KO NGA BAKWIT GIKAN SA MARAWI UG WALA PA KOY NADAWAT UG HINABANG SA DSWD APIL ANG FOOD ASSISTANCE, UNSA AKONG BUHATON?

Pagparehistro diha sa inyong purok leader kung aha ka nagpuyo karon nga barangay. HULYO 5, 2017 ANG KATAPUSANG ADLAW SA PAGREHISTRO SA MGA BAKWIT. Ang inyong purok leader maoy muhatag sa inyong pangalan sa barangay kapitan. Responsibilidad sa barangay kapitan nga muhatag sa inyong pangalan sa DSWD para i-validate ka, pinaagi sa pag-interview sa imo.

KUNG DILI KO MAKAREHISTRO SA HULYO 5, 2017, MAKADAWAT PA BA KO SA FOOD ASSISTANCE UG FINANCIAL ASSISTANCE?

Dili na makadawat sa food assistance ang kadtong dili makarehistro sa Hulyo 5. Ang tanang bakwit nga nakarehistro sa dili pa Hulyo 5 ug nakarehistro nianang adlawa mao ray i-validate sa DSWD.

UNSAY PASABOT SA VALIDATION NGA GIHIMO SA DSWD / CSWDO / MSWDO?

Ang validation usa ka proseso nga gihimo sa DSWD / CSWDO / MSWDO pinaagi sa pag-interview sa mga bakwit aron tan-awon kung tinuod ba sila nga bakwit gikan sa Marawi City. Gihimo kini aron ang mga ginapanghatag nga hinabang madawat gyud sa mga bakwit nga tinuod ug dili didto mga “sakay sa panahon.”

ANG TANAN BA NGA I-INTERVIEW SA DSWD PARA VALIDATION MAKADAWAT SA FOOD ASSISTANCE?

Kung mapamatud-an nga tinuod nga bakwit ang nakarehistro, kwalipikado nga makadawat siya sa food assistance. Pero kung makita nga dili tinuod nga bakwit ang nakarehistro, dili siya makadawat sa food assistance.

NAKAREHISTRO KO PERO WALA KO MA-INTERVIEW / MA-VALIDATE SA DSWD, UNSA AKONG BUHATON?

Duola ang inyong purok leader o barangay kapitan para sa status sa inyong pagrehistro. Ang barangay kapitan o barangay officials ang makigstorya sa CSWDO / MSWDO nga wala ka ma-validate aron ma-interview ka.

NA-VALIDATE NA KO SA DSWD, PERO WALA PA MI MAKADAWAT UG HINABANG SA AHENSYA? UNSA AKONG BUHATON?

Duola ang inyong barangay officials aron mahibaw-an ang schedule sa distribution sa relief goods. Ang inyong barangay officials ang naka coordinate sa CSWDO / MSWDO sa schedule sa pagpanghatag ug relief goods. Ang CSWDO / MSWDO ang magrequest sa DSWD ug relief goods para i-distribute kini sa inyong barangay.

PWEDE BA KO MUKUHA UG RELIEF GOODS UG FOOD ASSISTANCE SA OPISINA SA DSWD?

Dili. Walay distribusyon nga gabuhaton sa tanang opisina sa DSWD. Ang distribusyon ginahimo lang sa evacuation centers para sa mga bakwit nga nagpuyo sa evacuation center, ug sa barangay hall para sa mga bakwit nga nagpuyo sa mga komunidad. Ang schedule sa distribution nakaagad lang sa request sa CSWDO / MSWDO sa DSWD. ###