Madelatar ang paghatag og cash grants ngadto sa mga benepisaryo sa Pantawid Pamilyang Pilipino Program ang Land Bank of the Philippines tungod kay wala pa’y na-aprobahan nga service provider nga mopahigayon og pagbayad.

 

Kini human ni-atras ang Globe G-Cash isip service provider sa Land Bank of the Philippines (LBP) sa tibuok nasud.

 

Tungod niini, gapadayon karon ang proseso sa pag-bidding didto sa LBP sa kaulohan.

 

Adunay 26 ka lungsod ug usa ka syudad ang apektado sa pag-atras sa Globe G-Cash. Kini naglakip sa Mambajao, Mahinog, Catarman, Guinsiliban ug Sagay sa probinsiya sa Camiguin; Clarin, Jimenez, Don Victoriano, ug Concepcion sa probinsiya sa Misamis Occidental; Alubijid, Manticao, Libertad, Kinoguitan, Sugbongcogon, Naawan, Initao, Claveria, Balingoan, Lugait, Gitagum, ug syudad sa El Salvador sa lalawigan sa Misamis Oriental; Kitaotao, Cabanglasan, Libona, ug Malitbog sa probinsiya sa Bukidnon; ug Kolambugan ug Bacolod sa lalawigan sa Lanao del Norte.

 

Giklaro ni Atty. Araceli F. Solamillo, Regional Director sa DSWD Field Office 10, nga kompleto na ang tanan nga payroll ug acknowledgement receipts alang sa mga benepisaryo ug napasa na sa LBP alang sa pagbayad sa pagtuman sa benepisaryo sulod sa bulan sa Enero ug Pebrero ning tuiga.

 

Dugang ni Atty. Solamillo nga nahatag na usab ang pundo alang sa paghatag og cash grants gikan sa DSWD ngadto sa LBP.

 

Nakiglambigit usab ang DSWD Field Office 10 sa LBP sa kaulohan aron mapadali ang pagbayad sa cash grants sa LBP ngadto sa mga benepisaryo.

 

Matod sa Regional Director sa DSWD Field Office 10 nga nalooy siya sa mga benepisaryo ug nakasabot siya nga kinahanglanon kayo niini ang cash grants. Apan nagpasalig ang kauluhan sa DSWD nga mabayaran gayod ang mga benepisyaryo hantod mahuman ang maong bidding sa LBP.
 

Mopahibalo lang ang DSWD pinaagi sa mga Municipal Links kung kanus-a magpahigayon og pay-out ang mapili unya nga service provider sa nasangpit nga mga dapit.

==