Mitunol og 245 ka mga hygiene kits ang Department of Social Welfare and Development (DSWD) Field Office X ngadto sa mga IPs nga mga estudyante nga nagtungha sulod sa usa ka tunghaan sa mga lumad didto sa Malaybalay City, Bukidnon.

Ang pagpanghatag sa mga hygiene kits gi-atol sa pagsaulog sa adlaw sa pamuo sa tibuok kalibutan. Tumong sa kalihukan nga ma-abagan ang mga estudyanteng IPs sa Luyungan Indigenous Peoples High School sa nasangpit nga dakbayan sa pag-atiman sa ilang lawas samtang anaa sa sulod sa dormitoryo sa tunghaan.

Mandato sa ahensiya ang patabang sa mga vulnerable communities sama sa mga lumad pinaagi sa pagdalit og serbisyo ngadto kanila, ilabina karong panahon sa pandemya. Kauban sa DSWD sa paghatod og serbisyo ang sakop sa Regional Task Force on Ending Local Communist Armed Conflict 10, sama sa National Intelligence Coordinating Agency 10 ug Department of Education 10, ug organisasyon sa mga nagtungha sa kursong abogasiya. Ang kalihukan tipik ug bahin usab sa mga paningkamot sa RTF-ELCAC 10 nga molungtad ang kalinaw ug kalamboan sa tibuok Northern Mindanao, ilabina ang mga dapit nga apektado sa kagubot.

Ang DSWD magpadayon sa paghatag og serbisyo sa katawhan aron maundang ang kagubot ug matagamtaman ang malahutayong kalinaw ug kalamboan.