Pakyas sa pag-enroll sa Review Center si Jhon Lyod C. Omandam dihang nitapos siya sa Bachelor of Science in Radiologic Technology sa Medina College didto sa Barangay Tuburan, Pagadian City, Hunyo 22 sa niaging tuig.

Nasayangan si Jhon Lyod nga dili siya maka-enroll tungod naapil siya sa Top 10 dihang nag-Pre-Board Exam ang ilang tunghaan, pag-andam sa iyang batch aron mo-take og board examination sa radiologic technology pagka-Disyembre sa niaging tuig.

Nasayran ni Jhon Lyod nga di siya ka-enroll human sa iyang pakighinabi sa iyang mga ginikanan nga nagpuyo sa Tubod, Lanao del Norte.

Matud ni Jhon Lyod nga nihangyo iyang ginikanan nga mag-self review lang siya tungod dili makaya sa ginikanan pagbayad kung mag-review.

“I planned to enroll in a review center, knowing na isa ko sa Top 10 na nakapasar sa pre-board sa among eskwelahan. But sadly, nag-talk mi sa akong parents bahin sa review center and then they tell me nga okay raba maka-take og board exam nga wala naka review  center,” matud sa chat ni Jhon Lyod ngadto sa iyang kanhi Municipal Link, Earl Gumandol.

Busa, nipuyo si Jhon Lyod sa Pagadian aron makapangita og pamaagi nga maka-income aron iyang gamiton sa pag-take og board.

Tuod man, naka-raket si Jhon Loyd. Nagtudlo siya og sayaw didto sa Tabina, Zamboanga del Sur samtang nibukas usad siya og dance studio sa Pagadian City.

Pagka-Oktubre sa niaging tuig, mibukas kaniya ang laing kahigayonan. Gikuha siya aron mag-duty panahon adunay medical mission ang usa ka pribadong sektor didto sa Midsalip, Zamboanga del Sur. Bisan apike sa panahon, padayon gihapon siya nag-review human sa iyang duty.

Human sa medical mission, gikuha na sab siya aron magtrabaho didto sa Mahayag, Zamboanga del Sur. Lipay si Jhon Lyod kay makadugang kini sa iyang kita aron magamit sa pag-board niya sa Disyembre.

Hingpit nga review

Samtang ga-self review si Jhon Lyod, iyang chatan ang mga classmates nga nag-enroll sa review center aron kumustahon ug mamasin nga makapangayo og notes sa ilang gi-review.

“I chatted with my friends nga nag-enroll og review center. But, first gi-komusta ra nako sila kay maulaw ko mangayo og notes nila kay kabalo ko na nag-pay sila para sa review center ug ako wala.

“I started to review pinaagi sa YouTube and other ways nga makakita kog tun-an and I think that dili jud siya enough for me na mag-self review. So nag-take risk ko to chat with my friends and humbly ask them for some PDF and their notes and yes they give me something na pwede nako magamit sa akong pagtuon and thankful kayko sa akoang mga friends ato na time ug hantud ron,” tug-an ni Jhon Lyod.

Pressure sa gasingabot nga exam

Adunay panahon nga makaingon si Jhon Lyod nga dili niya kaya mopasar sa board examination. Niabot usab sa iyang paminaw ang kalaay sa kaugalingon nga mopadayon sa pag-review. Usahay, magsayaw-sayaw siya aron batokan ang pressure nga iyang nabati.

Hangtod niabot ang panahon nga iyang giingnan ang iyang kaugalingon nga mag-focus sa iyang pagtuon.

“Naka-question ko sa akong self nga dili jud maayo na mag-ingon ani lang ko. So niadto ko’g church and I pray nga hatagan ko’g dugang kusog o kadasig sa Ginoo para mapadayon nako ang unsa nga akong nasugdan,” ingon ni Jhon Lyod sa iyang chat.

Niuli si Jhon Lyod sa Tubod, Lanao del Norte aron maka-focus sa pag-review didto sa ilang balay.

Mga pagsulay

Dihang naka-desisyon si Jhon Lyod nga mo-uli sa ilang balay, nakasugata gihapon kini og mga pagsulay. Samtang gasakay siya sa bus, gisukahan siya sa bata nga gikugos sa iyang inahan, nga naglingkod atubangan niya.

“Nag-bus ko going Lanao del Norte. Suddenly naay nagsuka nga bata sa akong atubangan and nasukahan ang akoang jacket. I want to confront sa mama sa bata kay bisan sorry,  wala koy nadungog gikan sa mama. But, at the back of my mind, nakaingon nalang ko nga dili nalang nako i-confront ang parent . Need lang nako nga magkalma and pasagdahan nalang. So, wala nalang nako panumbalinga. Gi-hunahuna nalang nako nga basin gisulayan lang jud ko,” tug-an ni Jhon Lyod.

Ang mga pagsulay wala pa mahuman.

Samtang nisimba si Jhon Lyod, gibinuangan siya sa mga batan-on nga nisimba.

“I went to church sa Tubod, Lanao del Norte to pray nga makapasar unta ko. Samtang naako sa sulod sa simbahan,  wala ko nag-expect na hasta sa church binuangan ko,” saysay ni Jhon Lyod.

Dugang niya nga adunay tulo ka lalaki sa iyang likod nga nibutang og bubble gum sa iyang lingkoranan.Nangatawa pa kini nga nihimo sa ilang binuang. Pero, sama sa iyang gihimo samtang gasakay og bus, wala ra gi-confront ni Jhon Lyod ang mga batan-on tungod “basi gisulayan na sad ko.”

Dihang nibiyahe na si John Lyod paingon sa Cagayan de Oro City aron mo-take og examination niadtong Disyembre 11 sa niaging tuig, daghan na usab nga mga pagsulay nga niabot sa iyang kinabuhi.

“December 11, 2024 nibyahi ko padulong CDO para sa board exam and para makakita sa room assignment. Ang akong budget allowance nga gidala sulod sa akong pitaka kay P3,700 for 2 days. Wala ko naka-booked daan og ka-stayhan. So, naabot ko udto dadto and naka-kita ko’g ka-stayhan hapon na.

“First day sa exam pagka-December 12, excited kaayo ko nga mo-take. Alas 4:00 pa lang sa kadlawon nagkaon nako. Pagka alas 5:00 sa kadlawon, nisulod nako sa among room. Wala ko’y  tumbler nga kasudlan og tubig busa plastic bottle akong gidala. Sad to say, bawal ang plastic bottles. So, wala ko’y nahimo,  kung dili, dili nalang ko mo-inom og tubig kung mokaon nako. Wa ko naka-inom og tubig gikan alas 5:00 sa buntag hangtod alas 5:00 sa hapon kay bawal man mogawas. Didto ra sad ko kabalo nga bawal sad diay gamiton ang ballpen nga akong nadala. Pero, gitabangan ko sa proctor nga na-assigned sa akong room, gihulaman ko og ballpen nga akong magamit.Thankful kaayo ko nga naa ra’y kauban nako nga ni-take nga nagpahulam og pen sa akoa.

“Paghuman sa first day sa exam, nangita na sad ko’g ka-stayhan kay one night ra ang available sa akoa napuy-an kay naa nay naka-booked for the next night sa akong room. Naka-kita ra sad ko og kapuy-an nga igo ra jud sa budget. The night after sa first day,  I prayed nga makapasar ko para sa akong pamilya kay maguol kog dili makapasar. Dako na sila’g nagasto sa akoa.

“Pagka-December 13, last day na sa exam. I prayed dihang wala pa’ko mosulod sa room. Every question nga dili nako masabtan, nisampit ko’s Ginoo kay mao ra jud akong madaganan, gikan pa sa sugod ug hangtod ni-abot na ang exam. Na-end ang exam ug niuli ko balik sa Lanao del Norte. Gitagbo ko sa akoa Mama aron komustahon. Komusta daw ug naguol ko nga nitubag. Niingon ko’g lisod kaayo.

“Migaan lang ang akong pamati dihang  niingon si Mama nga, “okay rana, i-ampo ra na nato.” Honestly, three clusters ra jud akoang sure nga mapasar nako. Ang duha ka clusters ang akong nabalak-an. Ako nalang gi-surrender ang tanan sa Ginoo Kay Siya rajud ang nakahibalo sa tanan,” tug-an ni Jhon Lyod.

Sakop sa 4Ps ang pamilya ni Jhon Lyod sa Tubod, Lanao del Noete ug usa siya sa mga gi-monitor nga bata sa pamilyang Omandam kaniadto.

Mapasalamaton sa programa si Jhon Lyod tungod sa tabang nga nadawat niini.

Sangko usab sa langit ang pasalamt ni Jhon Lyod sa Ginood tungod sa dakong grasya nga nadawat niini.

“And always nako bitbit ang Bible Verse nga Luke 1:37 and Isiah 60: 22 and always nako gina-pray sa Iyaha nga ihatag Niya sa akoa karon nga year ug nakuha nako ang akong gipangayo. Truly, God is so good. Dili niya pasagdan ang tanan nga mosampit Niya,” sulti ni Jhon Lyod ug midugang nga, “when the time is right I, the LORD will make it happen (Isaiah 60:22).

==