Posted on

Gitambongan sa mga representante sa nagkadaiyang sektor sa lungsod sa Sumilao, Bukidnon, ang Municipal Orientation sa DSWD Kalahi-CIDSS PAMANA IP-CDD alang sa pagtuki sa nasangpit nga programa nga i-implementar sa 3 ka barangay sa lungsod ubos sa Batch 3 Cycle 1 sugod niining tuiga. (Kuha ni Mary Nathalie D. Soldevilla/SMO/KCRPMO)

Gipahibalo sa DSWD Kalahi-CIDSS PAMANA IP-CDD ngadto sa mga stakeholders sa lungsod sa Sumilao, Bukidnon , ang maayong balita kalabot sa mga proyekto nga ilang maangkon ubos sa maong programa aron pagpakgang sa COVID-19 sa ilang lugar.

Tulo ka barangay sa Sumilao nga mao ang Kisolon, Lupiagan, ug Poblacion ang makadawat sa tag Php600, 000 nga pondo aron pag-implementar sa mga proyektong pang-imprastraktura batok COVID-19. Ang tulo ka barangay aduna’y mga lumad nga komunidad sa Higaunon diin gipunting isip non-conflict affected barangays (CAB) sa Office of the Presidential Adviser on the Peace Process (OPAPP) ug paga-tunolan sa mga tukmang proyekto nga haom sa ilang mga panginahanglanon.

Usa pa ka barangay nga mao ang La Fortuna, sitio Intabas, gikan sa silingang lungsod sa Impasug-ong, Bukidnon ang makadawat usab sa laing pondo isip CAB gikan sa OPAPP nga mokantidad og 1.2 milyon agig pag-responde sa kasamtangang pandemya. Ang Sumilao ug Impasug-ong kabahin sa KADIMADT Ancestral Domain o Kitanglad, Alihuton, Danao, Inalad, Man-Egay AD Title nga mao ang implementasyon sa Batch 3 Cycle 1 sa Kalahi-CIDSS PAMANA IP-CDD niining tuiga.

Ang cycle 1 sa Kalahi-CIDSS PAMANA IP-CDD mo tutok sa pagpakgang sa COVID 19 ubos sa Disaster Response Operations Procedure o DROP sa DSWD Kalahi-CIDSS. Dili na bag-o sa lungsod sa Sumilao ang programa sa Kalahi-CIDSS tungod sa mga proyekto nga ilang nadawat sa milabayng tuig, ug karon magapadayon ubos sa bag-ong modality nga mao ang PAMANA IP-CDD.

Ang PAMANA o Payapa at Masaganang Pamayanan mao ang peace and development framework sa gobyerno nga nakig-timbayayong sa DSWD pinaagi sa Kalahi-CIDSS IP-CDD aron paghatod sa mga proyekto ngadto sa mga barangay pinaagi sa community-driven development (CDD) tumong ang pagkab-ot sa tunhay nga kalinaw ug kalamboan alang sa mga Indigenous Peoples (IP) communities.

Magsugod na ang proseso sa pagpunting sa mga proyekto base sa mga nag-unang panginahanglanon sa ilang komunidad diin pagapangulohan sa Barangay Disaster Risk Reduction Management Council (BDRRMC) inubanan sa aktibo nga pakiglambigit sa tribal council sa maong barangay.

Gihatagan og dakong pagtagad sa gobyerno ang kahimtang sa mga lumad niining pandemya isip pag-ila sa ilang mga katungod ug ilang katakos nga makadawat sa mga serbisyo gikan sa gobyerno aron sila magpuyo nga malinawon ug malambuon, luwas ug maayo ang kahimtang niining pandemya.