Mabayaran na gyud ang mga benepisaryo sa Pantawid Pamilyang Pilipino Program (4Ps) sa DSWD nga ilalom sa over-the-counter payment didto sa probinsiya sa Misamis Occidental karong umaabot nga bulan sa Oktubre.

Kini human nga niadaog ang MASS-SPECC sa bidding nga gipahigayon sa Land Bank of the Philippines Region 9.

Kahibaloan nga na-delatar ang paghatag og cash grants ngadto sa mga apektadong benepisaryo sa 4Ps tungod kay ni-expire na ang kontrata sa kanhi service provider sa Land Bank of the Philippines nga mao ang mohatod sa mga cash grants sa benepisaryo sa matag lungsod nga walay ATM machine nga iya sa LBP.

Apektado sa pagka-delatar sa paghatod sa cash grants mao ang mga benepisaryo sa lungsod sa Aloran, Baliangao, Bonifacio, Clarin, Concepcion, Don Victoriano, Jimenez, Lopez Jaena, Panaon, Plaridel, Sinacaban, ug Tudela.

Gitbuyag ni Kenneth Haze Sanchez, Regional Project Coordinator sa 4Ps sa DSWD Field Office 10, nga gipaningkamotan sa LBP ug MASS-SPECC nga malagdaan na og dali ang Memorandum of Agreement aron makapagula gilayon og Notice to Proceed sa pagbayad ang bangko.

Gidugang ni Sanchez nga nasabtan sa DSWD nga gikinahanglan na gyud sa mga benepisaryo ang ilang cash grants aron makaangkon og ikaayong lawas ug matarong ang pagtungha sa mga bata.

Sa tibuok Northern Mindanao, adunay kapin sa 270,000 ka households nga sakop sa 4Ps.

###