ANTONAA-I MAANA GIA FOOD AGO FINANCIAL ASSISTANCE?

Giae a food ago financial assistance na ipamgay ko mga mia-validate a bakwit odi na IDP a makakapopoon sa Marawi City. Paganay ron na miamgay a DSWD Central Office sa Sanggibo (P1,000) para ko mga bakwit inako Ramadan. Adun pun a ipamgay a P4,000 amay ko pumbalingan dun so mga bakwit sa Marawi City. Maana Limanggibo (P5,000) langon gia food ago financial assistance a ipamgay a gobyerno.

 

ANTAWAA-I PAKADAWAT SA GIA A P5,000 A FOOD AGO FINANCIAL ASSISTANCE?

Aya pakadawat sa gia Limanggibo a food ago financial assistance na sobo so mga miavalidate a bakwit o IDP sa CSWDO / MSWDO / DSWD, a sisii sa mga evacuation centers ago ko mbarambarang a walay maana Home-based.

 

ANDAY KIAPAMGAY SA FOOD ASSISTANCE A SANGGIBO (P1,000 PESOS)

Miagpoon mamgay a DSWD sa Sanggibo inako June 20 taman ko June 29, 2017 sii ko mga bakwit odi na IDP sa mga evacuation center ago home-based a miavalidate taman inako June 14, 2017. Giae a inipamgay na para ko peggaston o mga bakwit sa Ramadan ago Eidl Fitr.

 

OPAMA KA MIAKAKOWA AKO DUN SA SANGGIBO (P1,000) A FOOD ASSISTANCE POON SA DSWD INAKO JUNE 20-29, 2017 NA ANDA PUMAN I KAKOBRAA MI KO PATNGGIBO (4,000)?

So langon a bakwit odi na IDP a miakadawat dun sa Sanggibo (P1,000) inako June 20-29, 2017, na kakobra iran so Patnggibo (P4,000) iran amay ka mbaling siran dun sa Marawi, pakatokawon kano bo a DSWD-ARMM ko skedyul a kap-release.

 

ANDAY KAPAKAKOBRA O MGA BAWKIT O IDP A DA MAPUD KO MIAKAKOWA SA SANGGIBO (P1,000) A FOOD ASSISTANCE INAKO JUNE 20-29, 2017.

So langon a da makakowa sa Sanggibo na katimbul so kakowa iran a financial assistance amay ka mbaling siran dun sa Marawi City, maana Limanggibo (P5,000) langon a kakowa iran. Aya pamgay ago pagiskedyul na gia DSWD-ARMM. Tanodan tano a ayabo a pakakowa na so miavalidate a bakwit o IDP sa CSWDO / MSWDO / DSWD.

ANTONAY SOWAAN O BAKWIT ODI NA IDP A DAPN A MIAKOWA NIYAN A RELIEF ODI NA FINANCIAL ASSISTANCE A MAKAPOPOON SA DSWD?

Pakilista kano ko purok leader odi na barangay a kiatarosan niyo para kano niyan ma-endorse sa CSWD / MSWD / DSWD. Responsibilidad o omani purok leader ago barangay kapitan a miendorse iyan so mga listaan a bakwit odi na IDP, dadn a kailangan a papeles importante na mainterview iran so mga bakwit. So langon a dapn makaregister a bakwit odi na IDP na imanto bo a July 5, 2017 so katapusan a gawii a kapakaregister iyo.

 

OPAMA KA DI AKO MAKAREGISTER TAMAN SA JULY 5, 2017 , PAKAKOWA AKO PUN SA GIA FOOD AGO FINANCIAL ASSISTANCE?

Didun pakakowa sa gia assistance so mga bakwit a di pakaregister ko July 5, 2017. So langon a bakwit a miakaregister sa dipun maoma gianan a July 5, 2017 na ayabo ka-validate a DSWD.

 

ANTONAAE MAANA A GIA VALIDATION A DINGGALBEKEN A DSWD/ CSWDO / MSWDO?

So kamvalidate na isa ko mga okit-okit a dinggalbeken a DSWD / CSWDO / MSWDO a pakaokit sa interview ko mga bakwit odi na IDP. Isa ini ko mga okit-okit  o gobyerno para makowa o titu a mga bakwit so panabang kiran.

 

INO SO LANGON A KA INTERVIEW AGO KAVALIDATE A BAKWIT O IDP, BA PAKAKOWA SA GIA PAMUMUGAYAN?

O mailay a DSWD a bnar a bakwit so mianterview ago ma validate na kapakayan dun skanian a makakowa skanian sa gianan pamumugayan. Pero so kabnaran ami a naba pyor a bakwit na didun kapud ko mga pamumugayan.

 

MIAKAREGISTER AKO OGAID NA DA AKO KAPANGINGISAE ODI NA MA VALIDATE O TAGA DSWD, ANTONAAE SOWAAN AKUN?

Sung kano sii ko purok leader odi na barangay kapitan a katatarosan para mipangingisa iyo ron sa kapapantagan ko registration iyo. Siran a mga purok leader ago barangay kapitan na aya makipagstorya sa CSWDO/MSWDO a da kapun ma validate.

 

MIAVALIDATE AKO A DSWD OGAID NA DA KAMI MAKAKOWA SA MGA PAMUMUGAYAN A MAKAPOPOON SA DSWD, ANTONAAE SOWAAN AKUN?

Sung kano sii ko mga opisyal a barangay a katatarosan iyo an iyo pukatokawi so gawii a kapamgay sa mga relief goods So mga barangay opisyal na aya di-makindolona sa CSWDO/MSWDO pantag ko gawii o kapamgay sa relief goods. So CSWDO/MSWDO i pakarequest sa pamumugayan para ko mga bakwit sa barangay.

 

INO KAPAKAY BA A MAKAKOWA AKO SA PAMUMUGAYAN DERITSO SA OPISINA A DSWD?

Di kapakay. Daa pamumugayan sii ko solud a opisina a DSWD. Para ko mga bakwit a sisa evacuation center na ron kano dun pakakowa sa pamumugayan a DSWD. Para ko mga home-based a bakwit na sii kano dun pakanayaw ko mga barangay a katatarosan iyo. ###