Gapadayon ang pagbayad karon sa mga cash grants sa benepisaryo sa Pantawid Pamilyang Pilipino Program (4ps) nga ilalom sa over-the-counter.

Apan dili kini dungan o sulod lang sa usa ka adlaw tungod kay adunay skedyul nga gisunod nga natakda sa matag munisipyo ug dakbayan.

Ang gibayaran nga cash grants mao ang nasunod nga mga kondisyones sa benepisaryo sa 4Ps sa bulan lang sa Enero 2018 nga ilalom sa Period 6 nga pay-out.

Wala malakip ang bulan sa Disyembre 2017. Kahibaloan, ang Period 6 nag-cover sa bulan sa Disyembre 2017 ug Enero 2018.

Ang rason nganong wala malakip ang bulan sa Disyembre 2017 mao ang pag-uli sa kwarta nga na-alokar sa maong bulan sa wala pa matapos ang Disyembre 2017 gikan sa DSWD Central Office ngadto sa Bureau of Treasury tungod sa balaod nga gipatuman nga wala nay continuing funds alang sa 4Ps sugod niadto 2017.

Ang DBM (Department of Budget and Management) mao ang nagpatuman sa balaod nga wala nay continuing funds ang 4Ps sugod niadtong 2017. Nagpasabot, nga i-uli ang naka-alokar nga budget gikan sa DSWD Central Office ngadto sa Bureau of Treasury kung dili kini magamit sulod sa maong tuig.

Wala malakip ang Disyembre 2017 sa pagbayad sa tuig 2017 tungod gikinahanglan pa nga susihon ang pagsunod sa mga kondisyones sa benepisaryo sulod sa tibuok bulan sa Disyembre 2017 pinaagi sa compliance verification system, nga mao ang basihan sa paghatag sa cash grants sa benepisaryo sumala sa ilang pagsunod.

Sa pagkakaron, na-request na sa DSWD Central Office ngadto sa Department of Budget and Management ang na-alokar nga budget alang sa Disyembre 2017 aron mabalik ug mabayad kini ngadto sa mga benepisaryo.

Ang DSWD Field Office 10 igo lang mipatuman sa programa sa 4Ps. Ang budget alang sa cash grants sa mga benepisaryo anaa sa Land Bank of the Philippines nga gidrekta og download gikan sa DSWD Central Office ug makagawas lang kini paingon sa mga benepisaryo, panahon nga magbayad na sa cash grants.

Nagpasabot nga dili na moagi ang pundo sa DSWD Field Offices, sama sa DSWD Field Office 10. Busa, dili mahilabtan ang pundo ni bisan kinsa.