Lisod ang panginabuhi sa mga residente sa bukirang bahin sa Sagay, Camiguin.

Sagad kanila nanarbaho isip labor, ang uban wala gyud trabaho. Adunay pamilya nga gasalig sa income sa ilang bana ug anak. Busa, panahon sa kalisod, manghulam sila og bugas aron ilang malung-ag alang sa ilang pamilya.

Hangtod niabot ang panahon nga maglisod sila og hulam tungod wa nay mopahulam. Gamay lang ang madawat nga suhol sa pag-labor busa dili sila katigom. Busa, dihang napaila kanila ang Sustainable Livelihood Program niadtong 2018, dako kini og natabang kanila.

Nagiyahan sila sa mga Project Development Officers unsaon pagtigom ug unsaon nga maka-income pinaagi sa financial literary. Gawas niana, gitudloan sila pagtukod og asosasyon aron magtinabangay panahon sa kalisod pinaagi sa mapili nila nga panginabuhian.

Ang Sitio Baknet, Barangay Dumaligpe sa lungsod sa Sagay, layo gikan sa lungsod. Dihang nagtukod ang asosasyon og tindahan, galisod sila og dala sa mga produkto nga ialng gikompra sa lungsod tungod sa kalayo. Kung ilang peletehan sakay sa habal-habal, gamay nalang ang ilang mahimong ginansiya. Busa, gitabangan sila sa SLP PDO’s sa pagduol sa ilang mayor, Hon. Joseph Uayan.

Tuod man, misuporta si Mayor Uayan sa asosasyon ug sa mga residente sa Sitio Baknet pinaagi sa pagpahulam sa ilang sakyanan matag kompra sa asosasyon sa lungsod.

“Gamay ra ako income. Wala mi kalubian, wa sab mi kaugalingong yuta. Mao, sauna adtong wala pang SLP, ga-utang utang jud mi og bugas sa among silingan. Niabot ang panahon nga nibalibad na sila. Di nami kautang,” matud ni Evelyn Obedencio, presidente sa asosasyon.

Gidugang ni Obedencio nga swerte kaayo ang iyang mga kabuan tungod sa SLP. Nahimong inspirasyon usab sa asosasyon sa ilang pagpalambo sa negosyo ang ilang PDO ug sa tabang ni Mayor Uayan ngadto kanila. Karon, di na maglisod ang mga residente sa nasangpit nga sitio kung asa makahulam, gawas nga nahimong panginabuhian usab sa mga sakop sa asosasyon ang ilang tindahan nga gitukod.

Matud pa ni Obedencio, ang tindahan sa kaniadto pangandoy lang sa pipila ka residente. Karon, natuman na kini pinaagi sa SLP sa DSWD.