Cagayan de Oro City — Gi-alerto karon sa Department of Social Welfare and Development (DSWD) Northern Mindanao ang publiko batok sa mga nangolekta og kwarta bugti sa kunohay paglakip kanila sa opisyal nga listahan sa Senior Citizens.
Giklaro ni Atty. Araceli F. Solamillo, Regional Director sa DSWD Northern Mindanao, nga wala nangolekta ang DSWD Northern Mindanao og kwarta o bayad ngadto sa mga sakop sa senior citizens aron lang malakip sila sa listahan sa mga modawat og social pension.
Ang pahimangno ni Atty. Solamillo gihimo human nakadawat og taho ang DSWD gikan sa social networking sites ug sa CSWD mismo sa Cagayan de Oro City nga si Teddy Sabugaa nga adunay nigamit sa ngalan sa DSWD Northern Mindanao ug nagdala-dala og sulat aron sa pag-ilad sa mga nag-edad og 65 anyos pataas.
Gidugang sa Regional Director sa DSWD Northern Mindanao nga subay sa lagda sa pagpatuman sa social pension alang sa mga senior citizens, kadto lang nag-edad og 77 anyos pataas ang pwedeng malakip sa listahan sa social pensioner.
Gawas niini, gikinahanglan usab nga nalakip ang nag-edad og 77 anyos pataas sa listahan sa Listahanan, ang kanhi National Household Targeting System for Poverty Reduction sa DSWD ug wala usab kini magdawat og pensiyon gikan sa Social Security System o sa Government Service Insurance System ug wala magsuporta ang mga anak niini.
Sa post ni Teddy Sabugaa, gi-alegar niini ang usa ka Jessie Perez Fernandez nga nangilad ug nangolekta og P500-P800 ngadto sa mga senior citizens aron ma-apil sa social pension.
Gihangyo ni Solamillo ang tanan sa pag-report gilayon sa DSWD Northern Mindanao kung adunay mamatikdan nga sama niining nga scam pinaagi sa linya sa telepono (088) 858 6333; mobile number 0915 440 8933; facebook account nga DSWD Northern Mindanao o sa buhatan sa DSWD Northern Mindanao sa Masterson Avenue, Upper Carmen, Cagayan de Oro City.
Ang madakpan nga nalambigit sa scam mag-atubang og tukmang kaso, panapos ni Atty. Solamillo.
Ang pagpatuman sa Social Pension nalatid ilalom sa Republic Act 9994 o ang Expanded Senior Citizens Act of 2010.
###SMU